Sempre quixen facer esta comedia dende que vin a película de Francis Veber. Penso que escollimos  o mellor reparto posible. Síntome orgulloso de presentarlles esta adaptación da “CEA DOS IDIOTAS”, e iso que non me quedei co papel bombón, pero ao final todos os personaxes interveñen directa ou indirectamente e vostedes van rir  coas situacións
que estes  xeran.
O mundo iría moito mellor con boa xente, aínda que fosen menos brillantes e tivesen menos
carisma. Esta comedia fala diso en parte. Reivindica o simple nunha sociedade afogada
no consumismo feroz. Fan falta sabichons e pícaros, pero os inocentes sempre permanecerán.
Bon, pois entre uns e outros ímola liar, nesta comedia de situación... tras situación.

Citizen inspírase no Citizen Kane de Orson Welles. Pero a nosa obra conta a historia dun suposto empresario galego do sector textil que se convirte nunha das persoas máis ricas e poderosas no último terzo do século XX. A historia do seu triunfo serve para explicar as consecuencias do proceso de globalización sobre un sitio que seguimos chamando Galicia, o triunfo dun individuo e o fracaso dun pobo.
Citizen 2 sitúase dentro das paredes dun taller de confección formado exclusivamente por mulleres, para contar a historia deste fenómeno colectivo que supuxo a partir dos anos 80 a mobilización de varios milleiros de mulleres traballando anonimante para levantar un imperio textil que nunca lles ofreceu máis ca o mínimo para a súa subsistencia a cambio dunha entrega total. Man de obra a baixo prezo no corazón de Occidente, autoexplotación subvencionada polas administracións públicas, perversión do cooperativismo. Unha forza de traballo de usar e tirar que deixou máis frustración, impotencia e rabia individual.

Daniel Buenaventura "o Zurdo", un extraordinario lanzador de coitelos, fundou a súa Barraca en 1920, xunto á súa muller Aurora. Durante 90 anos a Barraca do Zurdo, percorreu o mundo con espectáculos moi diversos e especiais, dende o seu pequeno teatro nómade. Os fillos e netos do Zurdo mantivérona viva.
Estiveron nas Misións Pedagóxicas durante a República, actuaron na fronte durante a Guerra Civil, partiron ao exilio a América e logo a Europa. En 1983 volveron por fin a España.
Este espectáculo é unha homenaxe a esa viaxe sen fin, a eses artistas de variedades que souberon manter o compromiso coa sociedade dende a súa arte ao longo de máis de 90 anos.