“As amizades perigosas” é unha excelente obra de teatro de Christopher Hampton baseada na novela homónima de Choderlos de Laclos, que tan só foi representada unha vez en Madrid.
A pesar de que a novela foi publicada en 1782, é un texto que fala sobre asuntos de máxima actualidade nos nosos días, como o abuso de poder, o consentimento ou de como o diñeiro consegue, desgraciadamente, compralo case todo. Valmont e Merteuil, os seus protagonistas, dous personaxes fascinantes e “sen freo moral” –tal e como os definiu Jean Paul Sartre–, non se afastan moito de xente como Jeffrey Epstein e Ghislain Maxwell, por citar tan só a dúas das celebridades que participaron nun dos moitos escándalos que coñecemos durante os últimos anos.
“As amizades perigosas”, “un libro que arde como o xeo”, como dixo Baudelaire, fala de cousas que pasaron, pero que aínda seguen pasando, de como as clases máis poderosas son capaces de xogar con total impunidade cos menos favorecidos, e de como o sexo e a necesidade de posuír marcan, a miúdo, as nosas vidas. O propio Christopher Hampton dicía ao pouco de estrear a súa obra: “O que fascina desta historia é a súa vixencia. A manipulación dos sentimentos e o uso do amor como arma son temas tan actuais hoxe como o eran no século XVIII”.
