REAL FILHARMONÍA DE GALICIA
"Os Elementos"
Discípulo de Lully, o compositor barroco Jean-Féry Rebel foi o director do aclamado conxunto Les 24 violons du Roi. A súa obra Les Élements percorre en sete seccións o singular camiño que vai desde o caos inicial á orde e beleza que os catro elementos traen ao universo: as frautas representan a auga e o aire; o baixo, a terra, mentres que os violíns simbolizan o lume. Este programa prosegue coa suite da ópera Céphale et Procris, da compositora e famosísima clavecinista Elisabeth Jacquet de la Guerre, obra que a fixo célebre no París de 1694. De la Guerre, a pesar dos seus éxitos, deixou de compoñer de maneira misteriosa. Pero se se fala de enigmas, a morte de Leclair, o compositor da suite Scylla et Glaucus, é sen dúbida unha das máis indescifrables da historia da música. Dúas suites de Rameau pechan un concerto repleto de xoias barrocas da música francesa, que trae aos atrís da RFG a artista en residencia Amandine Beyer.
Amandine Beyer, directora e primeiro violín
Jean-Féry Rebel: Les Élements
Elisabeth Jacquet de la Guerre: Céphale et Procris (Suite)
Jean-Marie Leclair: Scylla et Glaucus (Suite)
Jean Philippe Rameau: Zoroastre (Suite) e Les Fêtes d’Hébé (Suite)
