IGNORANCIA.- Falta de ciencia ou de noticias sobre un asunto particular ou xeral. SHAKESPEARE.- Criador e produtor teatral de grande suceso no século XVII. O aspecto inicial do espectáculo é o do produto didáctico en estado puro, recalcando a condición do público de colectivo carente duns concretos coñecementos. Desde esta transparencia expositiva, o primeiro que se desenvolverá na escena será a conferencia dun prestixioso profesor. Presumidamente, a conferencia pretende ser unha amena palestra para un público con coñecementos menos que básicos da inmortal obra do conspicuo bardo. O profesor reclamará, para facer máis deleitosa a instrución que pretende inocular nas moleiras dos circustantes, o concurso de dous actores talentosísimos, máis temporalmente desempregados. Estes son MOFA&BEFA. MOFA&BEFA irrompen na académica conferencia sobre o famoso autor para pór en primeiro plano as escenas máis ignoradas, por desidia ou falta de oportunidades, polo público actual. A risa máis cruel, as intimidades máis vergoñosas, os actos máis deshonestos, as vilás máis astutas, os mecanismos máis ocultos do mal serán mostrados pola máquina cómica a MOFA&BEFA. Asasinos, esmoleiros, bufóns, conspiradores, cornudos, chivatos, oportunistas, torturadores, todos os personaxes que nunca teñen o protagonismo, terán agora a oportunidade de mostrarse no primeiro plano. Cando escollemos o termo “ignorantes” referímonos só a una parte do significado da palabra. Case todos os dicionarios importantes clonaron a mesma definición de ignorancia: “Falta de ciencia ou de noticias sobre un asunto particular ou xeral”. Nós dirixímonos a un público falto de noticias, estritamente sobre Shakespeare e que ansíe telas, para o seu uso persoal. Pensamos que a ninguén se lle pode atribuír falta de ciencia para desfrutar de Shakespeare, porque nada do humano foille indiferente. Até o punto de que moitos afirman que el foi o zoólogo que mellor coñeceu a especie humana. O astuto e intelixente público a MOFA&BEFA poderá tirar deste espectáculo valiosos recursos para resolver problemas da a súa vida persoal, laboral ou pública.
